Tasnefyirt deg tneɣrit n tmaziɣt

Almad n tutlayt ur ibdid ara kan ɣef ulmad n yiferdisen n umawal akked wid n tjerrumt maca ibedd daɣen ɣef ulmad n yiferdisen i yettuneḥsaben d agerruj inmetti, adelsan n tutlayt. Iferdisen-a lan aṭas n talɣiwin : tinfalyin n tutlayt, tinfaliyin timezdiyin, inzan atg. Iferdisen isnefyiren d aḥric seg tutlayt n yal ass. Skanayen-d tibuɣert tadelsant, tutlayant n yal tamɣiwant.
Tixutert-nsen tettbin-d ladɣa deg leqdicat i d-yellan ɣef tesnalmudt n tutlayin tiberraniyin, gar leqdicat-a ad d-nebder win n : (Galisson R, 1983, Vittoz M-B, 1989, Byram, M, d wiyaḍ. 2002, 2005, Scott M & Tribble Ch, 2006, González Rey I, 2008, Cavalla C, 2009, atg.). Iferdisen-a isnefyiren sɛan tixutert deg ulmad n tutlayt taberranit imi win ur ten-nessin ara, yezmer ad d-yemlil uguren deg usemres n tutlayt-a. Ihi, tamussni n yiferdisen-a d tagejdant.
Deg taɣult n tesnalmudt n tutlayt n tyemmat, iferdisen-a ur asen-yettunefk ara wazal imi amsiwel n tutlayt n tyemmat yessemras-iten yal ass deg tmeslayt-ines war ma yerra lwelha ɣur-sen. Гef wakken i d-tenna González-Rey I., « Deg tutlayt n tyemmat, tiɣessiwin-a tusdidin d tiɛekzin iɣef yettbedday yider-nneɣ asnilsan, i nessemras war leɛtab, d ayen i iṛebbun azal i sɛant » . Maca, ula deg tutlayt n tyemmat, iferdisen-a lan azal, yessefk ad ttwaslemden deg tneɣrit. Mel’čuk Igor., yenna-d : « Anasli yettmeslay s tesnefyirt, ma tettwaqbel tamuɣli-ya, yerna nekkni neqbel-itt, ad ibin belli almad imezgi n yiferdisen isnefyiren ilaq ad yili deg uselmed n tutlayt, ama deg win n tutlayt n tyemmat n unelmad, ama deg win n tutlayt taberranit, akken yebɣu yili leɛmer d uswir asensegmi n unelmad »
Yessefk ɣef unelmad ad yissin iferdisen isnefyiren iwakken ad yessiweḍ ɣer tezmert taywalant ladɣa imi iferdisen-a ugten deg yal tutlayt. Daɣen, tazmert tasnefyirant tekki ɣer tzemmar-nniḍen i yessefk ɣef unelmad ad yesnerni.
Rnu ɣer wannect-a, iferdisen-a skanayen-d i unelmad tibuɣert akked ccbaḥa n tutlayt akken i as-ttaken tamusni i ilaqen i tewyalt.
Asekcem n tesnefyirt deg uselmed n tmaziɣt, d timernit n tibuɣert i unelmad akken i d-yenna Guilhermina G., « Asemres n tesnefyirt deg ukala n uselmed, d tikci n tibuɣert n zzyada i yinelmaden, assaɣ-nni gar tutlayt akked tirmit n umdan. Tibuɣert-a tettak-d tudert i tutlayt, dɣa nezmer ad d-nemmeslay ɣef telswit n tutlayt akked uselmed » . Aya yettak i yinelmaden « taflest tutlayant » akked tikkin ɣer ugraw inmetti.
Ihi, aselmed n yiferdisen isnefyiren d agejdan. Aniwa aferdis asnefyir i yessefk ad nesselmed ? Amek ara t-nesselmed ? S wawal-nniḍen aniti tarrayin tisensegmanin akked wallalen isnalmuden i nezmer ad nessemres iwakken ad yettunefk wazal i tezmert tadelsant akked tmagit n yinelmaden deg uselmed n tutlayt n tyemmat ?
S wakka timlilit-a, i yekkin ɣer yiwen n usenfar, yebda deg useggas n 2021, yewwi-d ɣef uselmed n yiferdisen isnefyiren, ad tili d tagnit i umbaddel n tektiwin, n uskasi, n usumer ɣef usentel i d-yettunefken.