Tiɣri i tikkin

Ayen i yessemgarden amdan ɣef yimuddiren-nniḍen d tazmert i yesɛa deg tigzi n temsal d usnulfu n yizamulen d yinumak. Tizzumla d usemres-ines deg tudert d tawuri n umdan, yes-s i yettidir, i ibennu amaḍal-is, yesuddus assaɣen d wayen i t-yezdin d wiyiḍ (، المحواشي 2010: 15). S yizamulen-a d yinumak-nsen, i yesbedday idles aɣerfan, deg-s i d-tettban tmagit d yizri n yal aɣref d tikkin-is deg tgemmi tameɣradant. Yal aɣref yesɛa izri imawi iḥekku-d deg-s amezruy-is d tesḍa-is, yettak yes-s anamek i tudert-is tamazdayt, deg-s yettemlil umezruy akked tilawt, d wayen i yellan d tiqsiḍin tisugnanin d war tilawt deg yiwen n lqaleb. Tiqsiḍin tisugnanin i yiman-nsent zemmrent ad d-alsent amezruy aɣerfan i d-yessebganen iman n uɣref d tilin-is d tmagit-is akked tigzi-ines.

Asemnenni adelsan i yellan deg Tefriqt n Ugafa, d agemmuḍ n wayen din n tɣermiwin i d-iɛeddan fell-as, ixleq-d anermis gar-asent d tɣerma tamaziɣt. Aya yettuneḥsab assa d aɣbalu, i yiɣerfan n temnaḍt-a, deg lebni n teflas-nsen tideyyaniyin d tfugliwin-is, i yuɣalen d tignatin n usfugel yal aseggas. Gar tfugliwin-a, asfugel n       « Ixef n useggas amaziɣ » neɣ « Yennayer », i yettuneḥsab d tafaska n Tmazɣa akk, ladɣa deg tmurt n Lezzayer ideg tt-sfugulent tuget n temnaḍin.

Yennayer yessenfalay-d tigemmi tadelsant d tmagit n Tmazɣa, i yeḥseb Jean Servier deg umagrad Les rites du labours en Algérie, d ass aneggaru i uzraɛ d tyerza ɣer ifellaḥen (J. SERVIER, 1951, p 180). Imaziɣen sfugulen-t i usfillet d ufukti n tfellaḥt d wayen ara d-aǧǧwen deg useggas. Imaziɣen sfugulen Yennayer s wudmawen yemgaraden, d ayen i yettuneḥsaben d anagi ɣef yibeddilen ideyyaniyen d yidelsanen i d-yeḍran deg temnaḍt-a, aya yessebgan-d tibuɣert n yidles n Tefriqt n Ugafa, i yettaken anzi ɣer ukufi adelsan n yigduden i yettidiren deg temnaḍt-a s tmagit tamazdayt.

Ansay n Yennayer yeskan-d telqey n yidles amaziɣ, d udem i d-yeskanen tazrirt n tɣermiwin i iɛeddan ɣef Tefriqt n Ugafa, imi asfugel n Yennayer yebna ɣef unecfu aɣerfan d wansay imawi. Ɣef waya i nezmer ad nessismel Yennayer d aḥric seg tgemmi tamaziɣt, d aferdis seg tmagit taɣelnawt tazzayrit sumata, ladɣa mi yuɣal d tafaska taɣelnawt tunsibt, yuran deg tmendawt n Lezzayer, d ayen i t-iressan d yiwen seg wudmawen n tmagit taɣelnawt. Aya yeslal-d tamukrist n umhil-a (adlis) amazday: amek i d-tettban tmagit deg usfugel n Yennayer? Amek i uɣalent tigawin d wudmawen n usfugel n Yennayer d aɣbalu adelsan n Tefriqt n Ugafa? D acu i yeǧǧan asfugel n Yennayer yeṭṭef deg tnaslit? Ayɣer ur ibeddel ara ilmend n yibeddilen inmettiyen d yidelsanen i d-yennulfan assa?