Izamulen imaziɣen

Seg zik, iɣerfan semrasen izamulen irawlanen, iwakken ad jerden asenfali n tidmi-nsen, n teflas-nsen, tiggdi-nsen, idles d usugnan-nsen. Deg tidet, izmulen-agi i d-yeskanen tiɣawsiwin i seqdacen deg tudert-nsen n yallas, lan tizumla yesɛan azal ameqqran.

Seg uzermezruy ar imir-a, izamulen llan, yerna mazal-iten d lǧerrat i d-yessegzayen izri d tidmi n umdan. Izamulen zdin akk talsa, ttuneḥsaben d aḥric seg tegraɣlanit n yidles alsan, acku tawuri-nsen d asegzi n umaḍal. (BONTE (P) et IZARD (M), 2016, p. 688).

Izamulen llan deg tal tama, s talɣa n tecraḍ (lewcam) deg tfekka n umdan, neɣ d unuɣen ineǧren ɣef tɣawsiwin n usɣar, d ureqqem yettilin ɣef ijeqduren n yideqqi (talext) d uzeṭṭa, isɣunen d yifṣilen (leḥyuḍ). Tal tikkelt, izamulen-agi lan ayen din n yinumak i yettbeddilen ilmend n talliyin, d ayen i ibennun tigemmi tanmettit-tadelsant taxatart.

Tanakta-ya azamul tdel tilawt yenḍen, imi nemgal azmul, azamul yesɛa tulmist tagetnamkant. Azamul yesɛa ayen din n wudmawen ; d anmetti, d adelsan, d adeyyani… ilmend n Georges Gurvitch, deg usegzawal n yizamulen, « izamulen senɛaten-d s tuffra, ttefren s usenɛet ». Γef waya, yuɛer ad negzu inumak-nsen war ma nezzi ɣer wattal ideg d-ttwasnulfan.

Γer tuget n yimnadiyen, izamulen lan tixutert tameqqrant imi skanayen-d amek i d-tettili temyigawt gar uyiwen d umazday, gar timant d tenmettit, gar usugnan d tilawt, gar wuɣris d war uɣris, akked gar tezmert d lehlak.

Timlilit ara yilin s uzwel « Izamulen imaziɣen : d tigemmi gar ujlay, abeddel d useḥbiber » d asnubget n yimnadiyen i usikel deg umaḍal n yizamulen, deg usemres-nsen d unamek-nsen deg tmettiyin timaziɣin. Iswi, d asebgen n yinadiyen deg wannar i yemmugen ɣef yizamulen d yimahilen n ufus (lḥirfat) yemgaraden (azeṭṭa, ideqqi, isɣunen…) i yettɛawanen deg uḥraz d uselḥu n yizamulen, war ma nettu tigawin-nniḍen am uweccem amensay i yellan ar tura s wudem atrar. S lḥirfat-agi, ɣer tama n tmerrit d tdukliwin, i ssawḍen yizamulen ad d-zeggren i wayen din n talliyin d leqrun, war ma iruḥ-asen unamek-nsen.

Timlilit-a tra ad tessebɣer inaw d uskasi ɣef umgired i yellan deg usbadu n yizamulen, d twuriwin-nsen yemgaraden deg tal tallit. Timlilit-a ad d-tili d tagnit n uglam d uslaḍ, n tesnalest d wumyi (tumgist), n umezruy anmetti d yidles.

Aḥric ameqqran deg temlilit-a ad d-yili ɣef limarat d wunnuɣen deg wayen din n taɣulin (nesmenyif azeṭṭa, ideqqi, ticraḍ d ureqqem n yifṣilen) i d-yeskanen agraw n yizamulen, aṭas n yiniten d yinumak. War ma nettu abdar n yigdilen yellan deg tigawin-a d tenmegliwin i yudfen deg taɣulin-a. Acku, areqqem deg yideqqi d uzeṭṭa, senɛaten-d astan amatu i ugraw n yimdanen i yessemrasen allalen-a, maca lewcam skanen-d astan n uyiwen (mgal tiṭ, iḥeckulen d ssḥur sumata).

S umata, tiɣawsiwin-a i yemmugen s ufus, ttbanent-d amzun d tafelwit icebḥen n yidles azzayri, d amesbaɣur s yizamulen i d-yeskanen lsisan imazdayen, imesbaɣuren. D inagan ɣef umezruy-nneɣ, d asdukel adelsan, d tigemmi i d-newret ɣer yimezwura, i yesran aḥraz akken ad idum, ad iqabel akud d yibeddilen d-yettawi umaḍal atrar.